ꂴꊛ：ꉒꈌꈬꇬꉂꏣ(ꈬ)http://yi.yizuren.com/plus/view.php?aid=126
ꊰ
ꋋꄹꉖꈊꃀ，ꎭꈴꏳꇬꌤꃅꊿꌋꆀꋍꈭꋍꇍꀀꌠꉹꁌꈧꌠꉬꇮꄓꄉꃛꐯꃛꃅꇫꁏꐛꅹ，ꇦꀨꅇꁊꇁꀠꀊꂥꇈꀉꒉꂶꌠꆹꇬꀋꏅꇬꀋꏈꇬꀋꂿꀐ。ꄚ，ꋋꆹꃶꐚꃅꑘꒃꐽꑠꍈꄻꂚꄐꀋꁵ，ꄷꀋꁧꂷꇭꁨꑭꀉꇨꐯꀉꇨꑠꁙꆹ，ꈍꃅꀋꐚꃅꋌꎼꌧꂓꁦꌠꌩꇇꇢꊭꑆꄉꇁꌊꄚꃘꐽꎐꂰꀉꄂꐥꌠ“ꇌꉻ”ꋋꂷꇬꌸꐛꅹ，ꊿꋌꎼꑓꉼꌊꄉꇬꉚꀋꉆꃅ，ꀋꇊꆏꑱꏢꉀꑓꋪꑍꁆꌠꇬꍣꄉꌠꌡꇫꎍ。
ꃚꋒꂾꃚꑵꌠꇱꎟꄜꌠꂾꁈꂿꄷꐛꅹ，ꋍꅳꀧꇬꆹꌑꇌꂷꋌꇽꌊꋌꇱꋍꇰꏢꀕꃅꄉ，ꉌꂵꂶꌠꀉꄂꋍꈯꋌꀋꌅꃅꋌꃀꈳꅐꁧꀐꌠꌤꆿꈧꌠꀉꄂꌌꄆꒌꃑꃅꃑꄉꉜꀱꏿꇬꀀꎍ。ꄚꂷꇭꁨꑭꌫꇨꀕꈧꌠꆹ，ꋌꈍꃅꑌꋍꂾꁈꀋꄐꌠ。ꃘꐽꎏꂰꀉꄂꐥꌠꑲꌺꋋꂷꆹ，ꇿꇬꑌꂷꇭꁨꑭꀉꄂ，ꇿꇬꑌꊷꇨꌠꀉꄂ，ꋌꀋꇊꆏꊰꇁꃆꄔꉙꀕꃅꐞꑠꇤꇬꊐꌠꀋꏯ，ꋋꇅꃅꌗꇑꌊꐔꅑꄉꏽꃅꎍ。
ꂚꄏꊿꈢꄚ“ꇌꉻ”ꋋꂷꇬꊐꄉꀊꉗꏢꀋꐛꌦꂾꆹ，ꋌꎼꉌꂅꑒꑣ、ꉌꊰꑓꊰ，ꋍꑍꐥꅷꃅꈊꉚꀋꑍ，ꋍꑍꐥꇬꃅꐎꌕꈎꐥꌠꄂ。ꀋꉊꂴꆽꆹꋍꑍꌠꊿꈍꑋꂿ，ꋍꑍꌠꅇꈍꑋꉉꌠꑤꊈꎼꏹꂷ，ꋍꉔꀉꄂꃅꊿꇱꈢꈑꇙꄚꑳꁥꌺꑠꍈꇬꊐꄉ，ꀋꃉꆏꊖꁍꌌꀑꈑꃅꀀ，ꈌꅑꅇꉉꅈꀋꊌ、ꑓꅑꊌꂾꅉꀋꊌ、ꇇꅑꃅꅍꎷꀋꊌ，ꋌꀉꄂꀕꃅꐥꐛꅹ，ꉜꎼꇁꇬꐤꎭꑎꆏꌥꎭꀋꐰꌠꌡ。ꊽꉌꂅꑓꑣꈥꇤꀕꌠꐛꐪꋋꈨꂨꁖꇫꎭꂿꄷꐛꅹ，ꋋꆹꀋꀀꀋꑌꃅꃚꋒꀁꂥꌺꃅ，ꊨꏦꃅꈋꉹꁌꈍꎞꑵꉙꑠꌌꑵꅷꐺ，ꋍꃢꋍꃢꆏꃚꋒꀁꂥꌺꃅꌉꈿꁻꏤꄮꐰꊽꉌꇿꑓꇿ、ꊽꈓꊟꊋꊡꅍꐥꌠꌉꈿꑵꉙꑌꉙꑵꑟꃅ。ꈊꃀꌙꈈꀕꑠꋍꉔꆏ，ꋍꉌꂵꊼꇅꐂꇈ，ꀊꅰꃅꇬꑵꇬꉗꑲꀋꌧꌠꑵꉙꑠꎴꇁꋍꉌꃀꈏꇓꄉꐂꅔꁖꇁ，ꑵꉙꋋꎴꆹꋋꐊꅷꀊꄶꂷꉐꆈꑰꀕꌠꃅꌋꀊꎴ，ꉪꇐꐥꌠꀄꂼꀊꋨꂷꈿꀀꅷꃅꄜ……
ꑵꉙꋋꎴꆏꆀꃅꆸꈈꈬꉘꃅꈋꃅꐥꈴꇈꉹꁌꈀꄸꑌꇬꑵꇮꌠ《ꀊꌱꑘꀕ》ꊱꌠꉬꅊꇈ。ꂚꄏꑌꈍꄮꇬꑵꉙꋋꊱꋌꌷꐛꌠꋌꀕꀋꎺ。ꋌꏤꐪꀋꁨꀊꋨꄹꉖꈊꃀ，ꊨꏦꀉꄂꃅꀊꄶꌧꂓꇂꃴꑌꄉꇁꉚꌠꀊꄷꀈꏦꇁꉚꌠꆹꉼꉹꂾꃚꐩꋊꎵꑳꀕꌠꑵꉙꋋꊱꉬꅊꇈ。ꀋꃋꋋꇅꇬ，ꎺꇁꉪꇁꄚꑟꄷꆏ，ꂚꄏꀀꈤꇬꄉꋌꄓꇬꉆꇈ，ꑓꋪꊼꇅꂭꄉ，ꀊꄶꎸꅍꌍꑓꉈꏭꑆꄉꈐꏭꁨꇁꌠꂷꇭꑭꈧꌠꂾꎎꄉ，ꀅꌳꌺꃅꑭꁘꐕꅷꐺ，ꄷꀋꁧꉌꂵꈐꄉꀅꌳꃅꑵꉙꑌꑵꅷꐺ：
ꀊꌱꑘꀕ,ꅽꅿꑵꃚ,
ꅽꅿꑵꃚꑞꃅꋍꃅꉌꎭꇁꌠꉬꀒ?
ꅽꊿꀊꋨꂷꄚꇬꐞꁧꀐꄷꌠꅀ?
ꀊꌱꑘꀕ,ꅽꅿꉙꃚ,
ꅽꅿꉙꃚꑞꃅꑠꃅꉌꐒꇁꌠꉬꀒ?
ꅽꊿꀊꋨꂷꀱꄚꇬꀋꇁꀐꄷꌠꅀ?
……
ꋋꇅꃅ，ꂷꇭꁨꑭꀉꇨꁙꌠꀋꌬꒉꀐ，ꊛꄉꉘꁮꑭꈞꆈꃹꒉꄮꇬꁧꀭꇉꀭꈧꌠꀋꏯ，ꀅꌳꀅꌳꃅꆈꋧꋪꌠꇱꁿꇫꎭꄉꑡꑌꊌꀋꂿꀐ。ꊁꊛꄉ，ꀃꈈꉈꏭꊿꈳꅉꇬꑭꁘꂾꃚꇫꈌꐚꇁ，ꊿꄹꁆꇨꆰꇨꊸꃅꄆꅇꇴꅷꐺ，ꂚꄏꇁꌊꌍꑓꏢꁮꇬꉆꄉꉜꇬꆏ，ꑤꍰꇓꈓꋋꂷꃅꆈꋧꋪ，ꄆꍣꄆꀋꃑꌦꀐ。ꌍꑓꉈꏭꃅꆳꀉꒉꃅꁏꅷꐺꐛꅹ，ꃅꄂꈧꌠꀋꆏꃅꇙꅷꐺꄉ，ꃅꃴꇬꃅꏸꈧꌠꆹꌫꌦꑍꌦꄹꎍ。
ꌧꂓꁦꌠꇬꋋꇅꃅꁁꇅꍧꇅꃅꑠꇫꈌꐚ。ꌩꑭꌩꇇꈧꌠꀋꆏꃅꇬꊎꉈꈧꅷꐺ，ꌍꑓꁬꌠꋍꂴꆽꄉꏶꄹꁉꇁꇈꊿꁱꒌꂶꐂꄚꈐꏭꃹꇁ。
“ꂚꀯꍈ，ꉪꊇꇁꀐ。”
ꅇꂷꉉꌐꄷꌦꆏ，ꌩꏾꃅꆳꇱꁏꌊꇁꌠꀋꏯ，ꊿꀉꁁꋍꂷꑌꐂꄚꈐꏭꃹꇀꌦ，ꀋꃉꌌꂴꂶꌠꆹꈍꄮꇯꆐꂚꄏꇱꉜꐝꉅꀐ，ꋋꆹꎭꂵꊞꐂꉬ。ꋌꀋꇊꆏꄚꇬꑲꋦꃥꌋꀋꁧꂶꌠꀋꏯ，ꊒꀕꃅꋌꅞꀀꈤꀂꏽꑌꎍ。ꀃꈈꄀꄉꈭꐨꆏꋌꇁꀃꈈꏢꁮꇬꉆꎍ，ꂃꐡꈫꌠꀊꂥꐯꀊꂥꃅꋌꍣꑭꆹꁡꊭꀋꃀꄩꑟꄉ，ꏸꑭꀉꒉꌞꃆꍬꋑꌠꑌꄇꇖꀕꃅꇬꁖꎍ。ꊿꊁꂷꌠꆹ，ꎽꁁꀍꄟꅑ，ꃀꆏꀊꏂꏁꇅꅍꑠꂷꑌꅑ，ꂚꄏꎔꎗꃅꊼꇅꉜꇬꆏ，ꈀꄸꂷꉬꌠꋌꉜꐝꉅꀐ—ꊿꁦꋠꃢꈜꈚꄉꁦꋠꃶꀋꐚꋋꂷꆹ，ꄧꀕꃅꂚꄏꑍꇁꌋꀋꐥꃅꇫꉂꇈꇫꂿꆹꀋꀬꌠꀊꄸꀈꏦꉬꅊꇈ！
“ꀈꏦ，ꆏꈍꃅꄚꅐꇁꌠꉬ？……ꇫꑌ，ꄚꇬꀨꄂꀋꐥ，ꉎꀀꈤꀂꏽꑌꇁ”。
ꀈꏦꇙꀋꋏꃅꇬꉆꎍ。ꋍꑓꋪꇬꆹꇿꌠꌋꆀꐒꌠꑠꐯꇯꐛꂨꅍꇬꀀꎍꌐ。
“ꉆꀕ，ꆏꉠꏯꄚꇁꃅꀋꉉꄷꌠꅀ？”
“ꆍꊇꑞꃅꀋꉪꀋꏣꃅꄚꑤꍰꇓꈓꇬꃹꇁꀬꌠꉬ，ꐏꎭꊿꁥꌠꆍꌥꌠꀋꏦꅀ？”
“ꉪꊇꄻꄉꀕ，ꋀꊇꆹꉪꀋꌧꌠꉬ。ꋀꌧꎼꇁꇮꇬꑌ，ꉪꊇꆹꉈꑴꏡꁈꀉꁁꐥꑴꌦꌠꉬ。ꄆꍢꈐꏭꂯꉪꊇꊿꇫꐥ，ꈍꄮꇬꄆꄡꃑꄷꆏ，ꈍꄮꇬꄆꀋꌞꄆꀋꃑꌠꉬ！”
“ꆍꊇꆹꇯꍝꃅꀉꇨ！”ꂚꄏꀋꌦꀋꌋꃅꉉꅷꐺ，ꋀꊇꏭꀮꄑꅀꁒꐀꌠꉬꀋꐚ。
“ꑠꃅꑲꆏꁧꌶꂿꇆ！”ꀊꄸꀈꏦꉉꇬ，“ꉪꊇꆹꆎꋩꆎꏦꇁꌠ，ꀋꎪꃅꆏꂶꌠꄈꀧꌊꋬꂻꈨꅪꃅꆿꃀꁡꇤꁧꅊꈫ！”
“ꋍꑠꆹꃅꀋꉆꌠꀋꇆ？ꉡꆹꄚꇬꐞꁧꀋꉆꌠꉬ。”
“ꑞꐛꅹꃅꐞꁧꀋꉆꌠꉬꀋ?”ꀈꏦꅞꀀꈤꏢꁮꇬꑌꎍꇈ，ꏮꂚꄏꏭꉜꄉꑠꃅꅲ，“ꑤꊈꀕꑼꉼꐜꀋꈨꀐ，ꑤꊈꎼꏹꌫꅉꀋꊌꀐ，ꆏꄚꇫꐥꌊꑞꂷꃅꂯ？”
“ꀊꑴ，ꄚꇬꉠꋙꈁꁠꆧꎑꑴꌦ，ꉡꆹꉈꑴꄚꇬꄉꊨꀖꌠꋪꒃꑴꌦ。”
“ꊨꀖ”ꄷꁱꂷꋋꑍꂷꌠꈨꇬꆏ，ꀊꄸꀈꏦꂶꌠꆹꀋꎺꃅꋌꄓꇬꉆꇈꋌꌦꏟꈯꀕꃅꂚꄏꆼꁠꑍꁆꌠꇬꎑꄉꉉꇬ：“ꑡꊨꀖꌠꉬꀋ？ꋋꆹꊿꇧꊋꌠꉬ！ꈌꐔꃮꐔꌌꊿꂃꌠꀂꏾꇬꍀꌠꉬ！ꆏꋋꀋꂿꅀ，ꀋꉻꇈꐂꌺꀕꂶꌠꐂꐯꐂꃅꐥꀐ。ꇅꂚ，ꅽꑠꆹꑽꃤꉬꌠ，ꐚꌊꁈꁳꌌꆼꍅꆹꆋꌠꉬ！ꉢꄝꇬꀋꏆ，ꉪꊇꆿꃀꁡꇤꋋꂷꃅꄝꇬꀋꏆ。ꆏꑷ，ꉆꐥꃅꉡꐊꁧꂿ，ꃆꀞꀊꐎꂶꌠꑌꀊꄶꌧꂓꇂꃴꉆꎍꀐ。”
ꂚꄏꂶꌠꆹꀊꄸꀈꏦꇇꋌꄹꇫꎭꇈ，ꉌꂵꑘꀋꒃꎌꅉꀋꎍꃅꅞꀀꈤꏢꁮꇬꑌꇬꎷ。
“ꉢꆿꃀꁡꇤꅽꀉꁌꀋꁧꅽꅰꌋꂶꌠꎹꁧꄷꌠꅀ？ꃴꄿꏁꍅꆐꑊꉪꋺꀕꀐ？ꆐꑊꄈꎀꍹꇬꃹꊂꋍꑍꀉꄂꐛꈨꀋꉬꀐ，ꑞꐛꅹꊼꇅꀋꉪꀋꏣꃅꐥꌠꉬ，ꉢꈍꃅꄉꎀꍹꀋꈁ、ꍬꏦꀋꐥꃅꄚꇬꐞꁧꉆꄷꌠꉬ？”
“ꀋꃉꀃꑍꆏꄈꎀꍹꇿꇬꐛ？”ꀊꄸꀈꏦꉈꑴꈁꀱꄉꉉꇬ，“ꀋꃉꀃꑍꆹ，ꑡꎀꍹꑌꀋꐥꀋꐛꆘꅝꀐ。ꀋꃉꆼꁏꈁꁏꁥꌠꀉꄂꇫꐥꀐ。ꋀꊇꆹꑡꎀꍹꌗ？ꇭꍣꄈꅀꇭꂱꄈꉬ？ꌤꃅꄐꅀꐚꁦꌋꉬ？ꎀꍹꑠꑌꇬꅇꅲꅇꃅꄷꌠꅀ？ꆏꋀꊇꅇꃅꅲꄷꇬꑌ，ꉪꊇꇫꉬꀋꅲꌠ！ꆏꋌꀋꎺꀐꅀ，ꆎꆹꉪꊇꄓꄩꅐꀐꌠꁏꐚꈧꌠꅿꑤꊈꎼꏹꉬ？ꉪꊇꑡꌂꑡꉂꌠ，ꆏꇬꀋꅲꀋꇭꉆꄷꌠꅀ？ꃴꄿꏁꍅꉣꑊꆹꐮꇖꐮꄟꋺꀐ，ꋀꊇꑌꎀꍹꄻꉆꑲꆏ，ꉪꊇꆏꑡꃅꄻꀋꉆꌠꉬ？ꇅꂚꀋ，ꆿꃀꁡꇤꄉꑤꊈꉼꂷꄻꁧꂿ，ꆏꁳꑤꊈꎼꏹꄻꎻꂿ，ꉪꊇꆹꂴꀨꇬꂶꌠꊁꂶꌠꃅꑠꀋꈁ，ꆎꆹꈍꃅꑌꑤꊈꎼꏹꉬ，ꉪꊇꁏꐚꈧꌠꎁꃅꌤꀞꆿꀞꑲꆏꍑꀐ，ꉪꊇꏃꂠꌊꐥꋊꐥꍂꃅꎹꉼꍗꑴꄇꈜꁤꇅꀕꏡꌠꇬꍬꄎꋌꐥ，ꐥꋊꐥꍂꃅꀑꏮꉈꑴꀋꉜꋌꐥ。ꉪꊇꄓꄩꅐꀐꌠꁏꐚꈧꌠꆹ，ꆎꌌꇤꁦꃪ、ꆎꌌꃅꇌꃅꊪꇬꑌꐥꋊꐥꍂꃅꉌꆐꀋꅑꑓꆐꀋꋠꌠꉬ。”
“ꉆꀕ，ꆏꄚꄉꈌꅇꃮꅇꋋꈨꉉꌊꑡꃅꂯꇆ!”ꂚꄏꂶꌠꀊꄸꀈꏦꅇꋌꇑꌊꄉꉉꇬ，“ꆏꉆꐥꃅꑌꈨꑌꃅꄓ、ꉆꈨꉆꃅꄓꄉꃴꄿꏁꍅꏭꌗꋏꒉ，ꑠꃅꇕꄟꄉꑠꆹꀋꍑꌠ，ꋋꆹꀕꑽꌠꉬ，ꃶꐚꃅꑽꈜꏢꉬꀐ！ꀋꃉꌌꉉꌠꅇꈧꌠꆏꄚꑟꄉ，ꈁꏾꃅꄝꁭꁘꇬꆹꅽꀂꏾꉢꇽꈌꍈꃮꍈꇫꎭꌠꉬ！”
ꀊꄸꀈꏦꆹꋌꀕꇷꋌꀕꇰꏭꃅꂚꄏꇬꊼꇅꎎꇈ，ꂚꄏꑞꐛꅹꑠꃅꃨꆰꏸꈧ，ꏸꏦꃬꑐꋥꂷꌡꌠꌤꃆꊧꀨꆹꋌꋋꉪꀋꀽꃅꇫꎍ。
“ꀊꑴ，‘ꃅꄂꀊꐎꌋꆀꃅꑆꃴꇉꀕꌠꆹꐥꍂꃅꐮꐊꂿꇐꏽ，ꄁꆈꀕꏸꀕꌠꌋꆀꃅꉩꆈꏸꀕꌠꆹꐥꍂꃅꐮꐊꂿꇐꏽ’”，ꀊꄸꀈꏦꆹꇗꐥꁆꐥꃅꉉꇬ，“ꃀꅉꆐꑠꃅꂿꇏꏽꀋꆆ”ꄷ。
“ꈍꃅꉉꄿꂿ，ꉡꆹꆍꊇꅿ‘ꑤꊈꎼꏹ’ꀊꋨꂷꄻꀋꉆꌠꉬ！”
“ꆿꃀꏦꄉꑿꀋꁧꉆꑴꅀ？ꏨꆉꏦꄉꃬꀋꉘꉆꑴꅀ？ꑊꋌꏦꄉꌺꀋꁨꉆꑴꅀ？ꃴꄿꏁꍅꉠꏯꄜꆎꇰꄷ，ꆿꃀꁡꇤꇭꍢꄉꑼꈧꌠꍛꀯꀊꏀꂷꋉꐛꄉꀐ，ꍛꀯꎼꏹꆹꃴꄿꏁꍅꄻꄉ。ꉪꊇꆹꇪꎹꄈꊈꎹꅉꀋꊌ，ꉈꑴꆺꃅꍘꉈꐍꊈꑌꎹꅉꀋꊌꄉ，ꉪꊇꆹꅽꏯꇖꂟꄉꌌꆏꁳꈌꁧꇁꎻꌠꉬ。”
“ꆍꊇꈍꃅꄉꑠꃅꀕꉆꌠꉬ？”
ꂚꄏꆹꀊꅰꃅꇨꊸꇁꀐ。ꀊꄸꀈꏦꌋꆀꎭꂵꊞꐂꏤꋋꈨꆹ，ꈎꄜꀊꏀꇨ，ꎖꋪꀁꑌꇨ，ꀑꆊꑌꌬꀋꇎ，ꌤꆿꊿꈨꇬꀊꄂꇬꂯꊿꎼꏸꏦꒌꆠꅐꉆꑠꋀꊇꃅꇫꅐꇁꉆꌠ。ꄚ，ꑌꇐꂄꂒꉻꒉꇈꐥꒉꌠꃴꄿꏁꍅꂶꌠꑌꋀꊇꐊꄉꈁꏾꃅꑠꃅꀕꇁꌠꆹ，ꂚꄏꀄꂼꊯꈁꂻꇬꑌꋍꈁꂻꇬꀋꑟꌠꉬ。
“ꆍꊇꑠꃅꀕꀋꉆ，ꑠꃅꀕꇬꆹꌺꇰꃅꐬꅤꌠꉬ！ꀋꃅꋋꇅꇬ，ꄈꎀꍹꊐꈁꐛꅈꇬꃅꌤꃅꌠꆏꄉꌐꀐ，ꉢꑡꌅꈌꐥꄉꆍꊇꃤꈌꁧꉆꄷꌠꉬ？ꆍꊇꅿꍛꀯꂶꌠꆹꋉꐛꀋꉆ”ꄷ！
“ꆏꇫꈌꁧꌅꈌꀋꐥꑲꆏ，ꑞꐛꅹꃅꉪꊇꏢꇋꌠꌅꈌꆏꐥꌠꉬ？ꇅꂚꀋ，ꆎꆹꀋꉊꉪꊇꏭꉙꂘꋺ，ꄈꎀꍹꐳꃅꊥꇬꌊꇁꇬꑲꆀꈝꃀꁮꌠꉬ。ꆏꅈꐙꐚꇆ？ꀊꄶꐚꌌꁈꈧꌠꆹꀋꃉꆏꉌꂵꇿꌦꒉꀐ。ꋀꊇꉉꇬꀋꃉꆏꏮꋀꊇꁵ“ꇝꂱꌠ”ꉬꋭꀐ，ꁱꀕꀉꒉꃅꇝꂱꌠꆹꋀꊇꄩꆽꎫꎍꌠꑤꊈꎼꏹ、ꐍꀑꎼꏹ、ꇪꎹꎼꏹꈧꌠꉬꇮꃅꋌꅥꇂꃴꅞꌐꀐ，ꉌꂵꇿꌦꄉꏽ；ꉈꑴꉉꇬꃅꃴꃄꅉꐛꐈꁏꇁꀐꌠ，ꈨꏮꈞꆈꃹꆪꏮꁧꎏꅐ，ꋀꊇꀱꉪꊇꄩꏱꄮꑟꇁꋭꌦꀐ！ꆏꅲꉏ，ꋋꆹꑡꅇꉬ？ꉪꊇꉈꑴꋍꃢꎀꍹꐥꃅꊥꇬꄉꄓꈁꁏꀋꇁꑲꆏ，ꇵꆹꎇꌊꋀꊇꁳꌌꆽꒇꆼꄵꉆꄷꌠꅀ？ꆍꊇꑤꍰꇓꈓꇬꉜꉏ，ꌞꊿꆹꎀꍹꐥ，ꆍꊇꆹꎀꍹꀋꐥ，ꇇꈎꄉꀋꉻꇈꐂꌺꀕꂷꁵꀱꒊꀱꇁꃅ，ꆍꊇꋌꌌꎭꃚꈍꑋꍈꅗꀐ！‘ꆈꒉꒊꃀꈭꅉꅼꅉꑟ，ꃪꊭꈝꃀꈳꅉꎬꅉꑟ’，ꇅꂚ，ꆎꆹꄚꇫꐥꀋꉆꀐ，ꆎꆹꐤꅉꂷꆦꄻꅐꀐ。ꉪꊇꀊꏀꌠꍛꀯꋉꄉꈭꐨ，ꉘꃀꐘꌠꏤꐪꆏ，ꉡꌋꆀꎭꂵꊞꐂꑋꁆꌌꑤꍰꇓꈓꄉ，ꆏꂶꌠꋩꌊꆿꃀꁡꇤꐥꁧꐘꌠꉬ，ꉪꊇꆹꉪꊇꃤꃅ，ꈀꄸꑌꐮꉈꀋꁒ，ꂱꑱꐥꐨꂱꑱꐥ。ꍑꀐ，ꑷꇆ，ꇅꂚ！”
“ꉢꉉꋺꀐ，ꉡꆹꑡ‘ꎼꏹ’ꑌꄻꁧꀋꉆꌠꉬ！”
“ꆏꎼꏹꀋꄻꇬꑌꍑꑴ”，ꀈꏦꅞꋍꏢꁮꑌꇬꆏ，ꈬꉘꃅꈋꀉꄂꐥꌠꅿꉗꑠꑵꂚꄏꅿꅐꇁ，“ꆎꆹꉪꊇꎁꃅꏡꁈꍈꏂꇬꑌꍑꐯꍑ。”
“ꉡꆹꊿꇱꈢ‘ꇌꉻ’ꇬꋍꈓꊐꄉꐛꅹ,ꐵꑌꐵꑷꇯꑌꇰꀐ，ꑡꏡꁈꍈꑌꏂꀋꄐꌬꀋꄐꀐ。”
ꀈꏦꆹꌗꀋꅐꃅꒊꒉꇁ。
“ꏡꁈꀋꏂꇬꑌꍑ，ꆏꉪꊇꐊꄉꐤꋌꐥ，ꉢꈾꃚꍀꆎꍈꂿ，ꑸꑽꋉꃱꏢꏬꆏꄎꂿ。ꈍꃅꄿꂿꌞꊿꁳꆏꊨꆎꏈꀋꎽ，ꈁꏾꃅꎭꃚꌌꆎꍈꀋꎽ。”ꀈꏦꅇꉉꃚꋒꐛꐈꀐ，ꂚꄏꆹꄡꇗꂿꐚꂿꀋꐚꃅꀈꏦꑓꁴꑍꄩꋌꊌꂿ。
ꂚꄏꃹꅼꃅꌗꇫꅐꇈ，ꑣꄓꏿꇬꉆꇈꋋꇅꃅꋌꅞꇫꑌꌦꀐ。
“ꉢꀋꉊꂴꆽꑠꃅꅽꃀꈴꀋꄉ，ꅽꉌꂵꃚꌠꃅꀋꋭ，”ꀈꏦꆹꂚꄏꊫꑌꄉꉉꇬ，ꃚꋒꊼꇅꑑꃹꏭꃅꐙ，“ꃴꄿꏁꍅꉠꏯꊨꋻꀐ。ꇅꂚꀋ，ꀋꃉꆏꉡꆹꄺꀱꀐ，ꉢꀋꃉꅽꅇꃅꀐ，ꀊꅰꃅꀋꑎꑴꌦꀞ？ꉑꄜ？”
ꂚꄏꏟꈯꀕꃅꀈꏦꋌꌭꄉ。ꋋꆹꅇꂷꋋꇬꇁꉚꌠ，ꋋꆹꎺꇊꐝꄧꀕꃅꀕꐎꈍꉗꏢꅇꂷꋋꇬꇁꉚꀐ。ꏟꈯꃅꋍꉦꃀꇬꊫꎍꄮ，ꀋꇊꆏꂚꄏꋍꄩꊰꈎꒉꌠꆈꌠꑮꆜꂷꀋꌡꃅ，ꋍꏭꁌꒉꂮꐚꈠꆺꅲꇫꌠꑍꅝꀣꅫꃀꂷꉬꌠꌡ。ꀋꉊꂴ，ꀈꏦꐥꎭꄺꎭꃅꐤꄮꇬ，ꋌꑤꊈꎼꏹꂷꅿꇖꂟꌠꉬꀋꅲ；ꀋꃉꀃꑍꑤꊈꎼꏹꐤꊋꆽꀠꃅꎌꄮꇬꆏ，ꉈꀋꎞꃅꋍꉂꏣꎵꑳꀕꌠꁉꄉꂚꄏꇬꋨꏦ。ꋋꆹꑞꐛꅹꉬꂯ？ꋍꇫꎭꃅꉈꌠꅀ？ꋍꇬꈐꊟꊋꊡꌠꉬꂯ？ꀋꉬꀐꇬꑠꃅꐮꉂꐮꅉꌠꉬꑲꆀ，ꋍꅿꐋꀋꌡꇣꋲꌠꂱꑱꌧꂱꑱꑴꁨꌠꉬꂯ？ꂚꄏꆹꑡꑌꀋꉪꀋꏣꀐ，ꄷꀋꁧꋍꏭꉌꀋꃹꉬꀋꅲꌠꏡꁈꑌꀋꐥ，ꋌꉈꑴꉪꅷꉌꀋꃹꉬꀋꅲꁆꏯꑌꀋꄀ。ꀈꏦꇇꋌꄝꎼꒉꈭꐨꆏ，ꈮꈜꃅꀈꏦꋌꄌꋍꂣꈓꇬꊐꄉ，ꊨꏦꊷꆣꀕꌠꉂꑟꑓꁴꈧꌠꁳ，ꈁꏾꃅꊰꇁꀋꃋꆸꈐꋌꉜꇬꇫꋒꀋꌧꇈꐋꀋꌡꌠꀈꏦꇵꆹꌋꆀꇱꄓꇬꊐꌐ。
ꂚꄏꆹꇭꀧꇖꌋꋋꂷꃅꑑꃹꀐ，ꇎꄮꀋꐥꃅꀈꏦꇭꀧꇬꄉꈬꊯꈬꉘꏝꁧꅾꉘꀕꌠꏶꅝꅷꐺ。ꀋꇊꆏꂤꈐꅿꉗꌒꌠꌡ，ꌧꃰꅿꉗꌒꌠꑌꌡ，ꃅꑌꈊꃀꍑꂷꊰꁬꏾꇬꉖꌠꏣ……ꐥꌒꄻꌒꌠꇫꑟꇁ，ꄚꑟꇁꐲꇨꐛꅹ，ꂚꄏꆹꋌꎼꀑꃀꑓꉱꏂꀙꐯꀙ，ꄷꀋꁧꋰꀋꄐꋰꀋꉆꃅꐙ，ꑡꑌꉬꇮꃅꋌꋋꐞꀋꉅꌐꀐ。
ꈜꎴꃅꄷꃅꈯꇬ，ꃅꇴꃅꏢꃅꊭꂾꏒꀕꌦꀐ。
ꄄꆈꈧꌠꉈꑴꋍꃢꀊꏀꃅꐯꏑꌦꐛꅹ，ꂿꃅꁬꌠꆈꏸꅍꑓꀋꂿꀐ，ꀊꄶꂿꃅꉜꉚꋯꀋꐛꃅꆈꏸꅍꎍꁬꌠꆹ，ꉈꑴꋍꃢꀑꑊꀊꄖꀑꑊꀋꈁꃅꌍꑓꉈꏭꌧꂓꇬꉱꎍꌦꀐ。
ꀊꄸꀊꏦꆹꂚꄏꂣꈓꇬꄉꈁꑓꂶꌠꐕꌊ，ꂚꄏꏭꉆꐥꃅꑬꇙꄿꀐꃅꇤꅷꐺ。ꂚꄏꆹꋍꈁꑓꂶꌠꈍꃅꐙꌠꋌꀕꉚꐞꀋꉅ，ꄚꋍꉌꂵꇬꆹꑍꇁꌊꉂꏿꌠꈁꑓꂶꌠꋌꉜꐝꉅꃲ，ꀋꃋꋋꇅꇬ，ꋍꆈꏸꀕꌠꈁꁯꑓꂷꌋꆀꅩꍠꀕꌠꂱꀯꂱꑆꇬꄉ—ꋍꉎꀋꐥꌠꋌꄛꑣꅐꇁ。ꋌꇇꄝꇬꀋꎭꃅ，ꀍꃈꏵꀠꃅꀈꏦꂶꌠꀊꅰꃅꋌꆼꃬꇰꏢꀕꃅꄉꀐ。
“ꇅꂚꀋ，ꉪꊇꑬꇙꄿꀐꀞ？”ꀈꏦꆹꊨꏦꈁꑓꃆꄔꐞꃅꐞꂶꌠꏟꈯꃅꋌꑕꂚꄏꉦꃀꇬꇱꄉ，ꇫꁱꇫꑐꄉꉉꇬ：“ꂿꃅꂷꉐꐛꇁꂯꀐ，ꋋꆹꉪꊇꑤꍰꇓꈓꇬꄉꑭꄑꁈꁧꊝꋽꄮꇬꉬ，ꉪꊇꉆꐥꃅꑭꄑꅀ？”
ꂚꄏꆹꁰꇬꑌꀋꐭ。ꄚꋌꉎꀋꐥꇉꊌꊋꌠꐥꌒꋌꑵꆹ，ꋌꈍꉗꏢꃅꊏꀈꏦꉌꂵꇿꇎꇁꀋꉆꌠꈁꑓꂶꌠꇬꅞꄉꏾꌠ。ꂚꄏꀋꃋꋋꇅꇬꆹꈍꃅꉉꑲꑌꆿꃀꁡꇤꆹꁧꀋꉆꌠꋍꊨꏦꅉꐚ。ꋌꀊꏀꄮꀘꋺꌠꄯꒉ《ꐥꌒꇩꏤ》ꋐꌠꋌꎺꇀꌦꀐ，ꀨꇁꄳꄷꀊꋨꂷꆹꀊꄶꈐꏭꄉꐥꍂꃅꊿꋌꃅꇬꑟꀋꄐꌠꑠꋌꒌꉪꎼꇁ。ꋌꉈꑴꀊꄶꈜꎴꃅꄷꑠꇬꃄꇙꃄꇙꋺꌠ“ꁏꐚꁡꇤ”—ꃴꄿꏁꍅꌋꆀꋍꀉꁌꀋꁧꈧꌠ，ꊿꇱꇧꊋꅷꈝꃀꏢꈳꅉꀋꊌꃅ，ꐮꊂꊛꄉꁈꆿꉈꇁꄉꐥꁧꇈ，ꊨꏦꌟꒉꌋꅐꇁꄉ，ꋌꐛꋌꐙꃅꐥꇉꊨꏦꃅ、ꊨꏦꋠꌠꐥꐨꐥꄸꑠꋌꎺꇁ。ꄚꑠꃅꑴꇬ，ꋌꀊꄶꐚꁦꌌꁈꇱꌌꆼꍅꌠꆹ，ꊿꏠꐮꆼꍅꌠꐛꐨꄽꂫꑵꌠꉬꂿꇐꏽ。ꀋꃉꀃꑍꆏ，ꈍꃅꑠꃅꀕꉆꂯ？ꌧꇗꋋꊐꈍꃅꄉꌌꌧꀈꏦꇰꂯꆏ？ꂚꄏꆹꀅꌳꃅꃹꅼꃅꇫꑌꄉꉪꅷꇁꇬꆏ，ꌤꀊꄶꀈꏦꐧꊭꇬꀵꎍꌠꇇꀊꋨꑍꁆꆹ，ꀋꋓꀋꉪꃅꋌꄝꇫꎭꀐꅊꇈ。
“ꇅꂚ，ꉪꊇꁧꄿꀐꀞ？”
ꀈꏦꊼꇅꌗꋏꇬꆏ，ꎭꂵꊞꐂꂶꌠꀋꇊꆏꀋꃋꑲꆀꀀꐚꇀꂷꀋꏮ，ꀃꈈꈐꏭꃹꇁ。ꋋꆹꐧꊭꇬꄉꎊꈬꈨꋌꀖꎼꇁ，ꉜꇈꂾꆏꋋꆹꂚꄏꎁꃅꊭꄎꄉꌠꏦꀨꅂꊐꏢꉬꅊꇈ。
“ꀈꏦꀋ，ꉢ……ꁧꀋꉆ！”
“ꆏ！……”ꀊꄸꀈꏦꂶꌠꄓꇬꉆꇈ，ꁱꐭꇬꃚꋒꆹꇨꇅꃃꄷꀋꁧꆸꉈꏭꃅꐛ，“ꆏꀃꑍꀋꁧꀋꉆꀐ！ꆏꎭꂵꊞꐂꏭꅇꂷꏤꄉꋺ，ꉢꇁꑲꆏꆎꆹꁧꐮꄉ。ꉢꆏꁳꈱꉡꊏꀋꎽꌠ！ꆏꋍꃢꀉꄂꈱꉡꊏꉆ，ꉢꆏꁳꑍꃢꈱꉡꊏꀋꎽꌠꉬ！”
“ꀈꏦꀋ，ꆏꊼꇅꅲꄉꉢꉉꆎꇰꂿ……”
ꋌꂚꄏꉉꀽꌠꀋꅲꃅ，ꀍꄟꂶꌠꋌꇔꄉꅱꈯꀕꃅꊼꇅꉈꎼꒉꇬꆏ，ꂪꌦꏣꀨꈍꎳꈍꎴꑠꏢꐛꇫꎍ。ꋋꆹꂚꄏꂶꌠꌌꐒꈄꄉ，ꀵꆿꃀꁡꇤꁦꏢꉪꇫꎍ。
ꉈꏭꊿꈳꅉꇬꑭꁘꂾꃚꈧꌠꇫꈌꐚꇁꇈꊛꄉꊾꈨꀃꈈꃭꉱꁬꌠꅥꅷꐺ。
ꋀꌕꑻꋌꇷꋍꏼꐂ。
ꎭꂵꊞꐂꂶꌠꆹꀋꎺꃅꐧꊭꇬꄉꌩꏓꅅꃅꏼꌠꋌꀖꌊꋍꁘꀉꄂꃅꋌꀥꀃꈈꃭꉱꁬꌠꏢꁮꇬꉆꄉꄐꏤꅷꐺ。
“ꂚꄏꀋ，ꆏꁖꉈꏭꊼꇅꇁꉏ，ꑸꆀꐋꀨꂶꌠꉥꅽꏯꇬꊼꇅꇁꉏꃅ。”
ꇫꇴꌠꆹꀋꉻꃢꌺꂶꌠꉬ，ꀊꄸꀈꏦꌗꃀꌗꌺꐮꑘꀋꒃꃅꎐꂷꋌꇱꌃꌊꇠꀕꃅꂿ。ꋋꆹꎭꂵꊞꐂꏭꑓꂭꋏꇈ，ꈍꃅꑌꄝꊾꋠꆿꃀꋋꂷꏆꀋꉆꃅꉉꅷꐺ。
ꂚꄏꀋꎺꃅꇨꊸꌊꑊꇤꇬꇴꂷꄧꀕꃅꊰ，ꋋꆹꀋꃋꋋꇅꇬꀋꉻꃢꌺꂶꌠꀋꉪꀋꏢꃅꑇꄚꈐꏭꃹꇁꌠꐒ。ꑠꅹ，ꋍꁁꏯꆏꃚꋒꀊꂥꃅꉐꅷꐺ，ꄸꀋꁧꉇꉈꃅꇤꆽꏦꆽꃅꑡꀕꅥꅷꐺꀋꐚ，ꋍꁁꏯꆏꏟꈯꃅꊿꑍꂷꌠꋌꇱꌭꇰꏢꀕꃅꄉ，ꀋꇊꆏꋍꑊꏭꉆꐥꃅꁈꌍꑓꉈꏭꒉꃅꉉꌠꌡ。ꀂꉗꍈꑠꃅꐮꄙꇫꎍꇈ，ꄽꂫꆏꊿꑍꂶꌠꋌꉉꋍꅇꃅꄉꀐ。
“ꉢꃆꏂꑍꈊꃀꉈꑴꋍꃢꇁꑴꌦ。”ꀊꄸꀈꏦꂷꌠꋌꐂꌍꑓꉈꏭꉆꇈ，ꀂꏾꎎꌊꂚꄏꏭꉉꇬ：“ꇅꂚꀋ，ꎺꄉꇆ，ꆏꑍꃢꈱꉡꊏꀋꉆꀐ！”
ꀃꈈꉈꏭ，ꊿꇳꃚꉏꃚꈧꌠꋍꃢꎓꁨꄹꇫꎍ。ꂚꄏꆹꀋꃉꌌꑲꆀꌍꑓꁿꅍꈧꌠꄻꇬꄀꄉ，ꀃꈈꁬꌠꆹꊿꀜꇫꎭꀐ，ꄆꂷꇭꈍꑋꏢꋓꃅꄔꋍꏭꉜꎍ：“ꑸꆀꐋꀨꆏꎷꇬ，ꆏꑡꐛꅹꃅꀃꈈꀋꁉꌠꉬ？”
ꂚꄏꆹꇫꅇꀋꀱ，ꂚꄏꆹꀊꄸꀈꏦꌋꆀꎭꂵꊞꑍꂷꌠꅔꅐꅔꁖꇀꏦꐛꅹ，ꀋꎺꃅꇨꊸꌊꀃꈈꁬꌠꉈꏭꉜꄉꀥꁧꀐ。
ꊁꊛ：ꉒꈌꈬꇬꉂꏣ(ꊯꊪ)http://yi.yizuren.com/plus/view.php?aid=128
