ꈬꉘꆿꆉꑵꃚꇖꈭꀕ ꆀꃅꀊꉘꉌꃀꊷꆣꀕ
ꄜꃑꄮꈉ： 2013-01-09 | ꁰꄻꊿ：ꀉꈌꏬꌋ ꂵꉌꍶꏣ
“ꈬꉘꆿꆉ”ꁥꌠꃢꈜꃑꌶꌺꁵ
“ꉪꊇꀃꑍꆏ,ꆈꌠꀉꑳꑵꉙꑵꂓꅑꂒꋦꌠ“ꈬꉘꆿꆉ”ꁥꌠꉪꊇꂿꀐꃅꄉ,ꋀꌕꑻꅿꍡꉙ《ꀉꂿ》ꂶꌠꋌꑵꉡꇰꌦꀐꃅꄉ,ꀄꂼꂻꌟꃅꐙꀋꆾ!”ꀋꑍꊂ,ꉪꇩꏤꆈꌠꀕꏀꑵꉙꑵꂓꅑꌠ“ꈬꉘꆿꆉ”ꁥꌠꉈꃅꀙꏢꄉꇁꌊꆀꃅꏪꐦꑟꇁꇈ,ꏪꐦꑤꊿꋅꁠꀀꌶꅉꇬꄉꍡꉙꍡꌶꅉꂘꃀꌶꌺ1500ꎖꑹꇰꇈ,ꂘꃀꌶꌺꃅꋀꇿꌦꄉꏽ。
“ꈬꉘꆿꆉ”ꁥꌠꍡꉙꍡꌠꐎꀘꉐꁬꄹꇬ,2013ꈎꃛꆆꄆꁱꄠ、ꎸꍓꄆꁱꄠꑠꇩꏤꑭꊂꄆꁱꄠ40ꎖꂷꐯꇯꄉꏮꋩꄮꇬꍡꉙ《ꎔꇁꃨꌠꍏꇩ》、《ꑵꉙꂾꃚꅲꌒꑟ》、《ꑵꃚꇖꈭꀕ》ꑠꌕꑵꃅꁷꄉꑵꂿꄷ,ꏮꋩꋋꈍꑋꑍ,ꉪꇩꏤꑭꊂꄆꁱꄠ40ꎖꂷꇬꄉꃑꎻꂿꄷ。ꆈꌠꀕꏀꑵꉙꑵꊿ“ꈬꉘꆿꆉ”ꁥꌠꆏ《ꑵꃚꇖꈭꀕ》ꈚꌠꄖꊩꄉꃅꎻꄷ,ꅇꈨꈭꐨꆏ,“ꈬꉘꆿꆉꁥ”ꌠꉈꃅꀙꏡꄉꇁꌊꏪꐦꍘꉈꑣꃪꄧꋂꐭꌶꅉꇬꇁ,ꇩꏤꑭꊂꋠꇐꅝꒉꈁꎔꎗꀕꋀꎹꌊꃪꄧꋂꐭꌶꅉꇬꁵꇁꇈ,ꆀꃅꁡꇤꌶꌺꀉꑳꈿꄉꉌꇿꑓꇿꃅꆈꌠꈎꏅꀐ。ꐎꀘꉐꁬꉉꇬ,ꊨꏦꃅꄷꊂꋊꀊꉘꌋꆀꋍꏅꌶꌺꆹꉪꆃꎭꃅꄷꀕꀋꁧꉪꆈꌠꊿꋋꁯꅿꊫꂫꉬ,ꎼꈎꆈꌠꈎꏅꄮꇬ,ꉈꃅꀙꏡꄉꇁꌊꆀꃅꁡꇤꄉꆈꌠꀉꑳꈿꄉꈎꏅꇁꌠ。
“ꈬꉘꆿꆉ”ꁥꌠꆏꍘꉈꑣꃪꄧꋂꐭꌷꅉꍇꌠꇬꄉ,ꋀꍡꉙꍡꇬꐥꐨꈝꃀꇬꐥꐨꐥꄸꑠꋀꌧꂘꃀꌶꌺꊈꇰꇈ,ꍡꉙꅲꌒꑟꌠꀉꑌꂷꋀꍡꂘꃀꌶꌺꊈꇰꄉ,ꌶꌺꏭꈐꊟꊋꊡꄉꎔꃅꌧꇐꁱꂷꌷ,ꉌꊢꑓꊢꃅꁱꂷꌷꌊꋍꑍꋍꉙꃅꀻꎆꆹꄉ,ꀉꒉꄮꇬꆏꆃꎭꀻꎆꌠꀂꏽꑆꅐꊋꌞꇁꅊꇈ。
(《ꆃꎭꑍꄜ》2012ꈎ12ꆪ23ꑍꎑꁬ ꆃꎭꑍꄜꀨꎹꏹꍓ ꀉꈌꏬꌋ ꂵꉌꍶꏣ ꁱꍑꌠ )
ꇁꀦ： ꆃꎭꑍꄜ
ꁰꄻꌠ：
beleys ｜
ꄜꃑꌠ：
