开云官网入口手机版app-手机客户端

《ꀉꂿꅩꌺ》(ꇖ)

ꄜꃑꄮꈉ： 2011-11-30 　|　ꁰꄻꊿ：ꇓꆈꀋꃀ

ꀉꂿꅩꌺꑌ,
ꑍꇂꌕꑍꐛꇬꆏ,
ꃇꑌꀱꈜꎭ,
ꅩꑌꃈꐊꋯ。
ꋋꑌꇬꇁꋌꌠꑟ,
ꌭꇁꄣꌠꑟ。
ꀉꂿꅩꌺꑌ,
ꃈꐞꅩꐞꄚꄉꐞ;
ꃇꑌꑓꁴꑫꀕꇤ,
ꏁꁏꀑꊥꁧ,
ꁧꏾꁧꂸꏾ,
ꏮꇊꊂꉚꃅ;
ꅩꌺꉌꈘꃈꊂꁠ,
ꇇꑭꃄꑣꊁꆹꑌꇈꃲ,
ꅩꌺꎮꑍꅉ!

ꀉꂿꅩꌺꑌ,
ꋩꃅꋩꌋꐊꄉꇁ,
ꋩꃅꀱꎜꑌ,
ꋩꌋꂸꀱꎜꇊꃲ。
ꏂꃴꏂꆈꐊꄉꇁ,
ꏂꃴꀱꎜꑌ,
ꏂꆈꂸꀱꎜꇊꃲ。
ꆸꎡꆸꇠꐊꄉꇁ,
ꆸꎡꀱꎜꑌ,
ꆸꇠꂸꀱꎜꇊꃲ。
ꇇꈯꇇꀘꐊꄉꇁ,
ꇇꈯꀱꎜꑌ,
ꇇꀘꂸꀱꎜꇊꃲ。
ꀑꊫꀍꃨꐊꄉꇁ,
ꀍꃨꀱꎜꑌ,
ꀑꊫꂸꀱꎜꇊꃲ。
ꃈꇁꅩꌺꐊꄉꇁ,
ꃇꌺꀱꎜꑌ,
ꅩꌺꂸꀱꎜꇊꃲ,
ꅩꌺꎮꑍꅉ!

ꀉꂿꅩꌺꑌ,
ꀊꆨꐰꇁꏤꇬꆹ:
ꉒꄓꉐꎭꇁ,
ꉒꇁꉐꐊꀱꎜꄉ;
ꀋꃋꉒꈻꁦꈌꏣꁧꃲ,
ꉐꈘꊖꃴꃹꇈꃲ。
ꒉꄓꉛꎭꇁ,
ꒉꇁꉛꐊꀱꎜꄉ;
ꀋꃋꒈꆹꇓꊨꈬꊐꐂꁧꃲ,
ꉛꀜꇓꇤꑐꇈꃲ。
ꑱꄓꑟꎭꇁ,
ꑟꇁꑱꐊꀱꎜꄉ;
ꀋꃋꑱꀱꑱꑳꃹꁧꃲ,
ꑞꆹꀋꀨꈬꊂꊰꇈꃲ。
ꉹꄓꉈꎭꇁ,
ꉹꇁꉈꐊꀱꎜꄉ;
ꀋꃋꉹꀱꉱꁧꎑꁧꃲ,
ꉈꈘꊖꃴꍣꇈꃲ。
ꃈꄓꅩꎭꇁ,
ꃈꇁꅩꐊꀱꎜꄉ;
ꀋꃋꃈꀱꀿꇁꃀꐮꑌꁧꃲ,
ꅩꈘꌐꐰꊰꇈꃲ。
ꅩꌺꑬꏸꊰꃺꑌ,
ꋍꏢꌐꈻꃀꄳꐂꄉꃲ;
ꇇꏸꊰꃺꑌ,
ꋍꏢꌐꈻꇇꒉꌸꄉꃲ;
ꅩꌺꆹꄱꏂꌠꑌ,
ꌐꈻꎭꑟꄀꄉꃲ,
ꅩꌺꎮꑍꅉ!

ꀉꂿꅩꌺꑌ,
ꅩꌺꀿꇁꃀꐞꆹ,
ꆺꑳꏂꃴꅞꇈꃲ。
ꃺꇁꑌꐞꆹ,
ꋍꁯꋍꑱꋦꁧꃲ。
ꐋꇁꊇꐞꆹ,
ꃄꇖꄹꊂꎭꇈꃲ。
ꈭꐞꈛꐞꆹ,
ꈜꐎꊪꇖꀕꁧꃲ。
ꁦꐞꇈꐞꆹ,
ꁦꑭꅡꊪꀕꁧꃲ。
ꒈꐞꃪꐞꆹ,
ꒉꈜꐍꊏꀕꁧꃲ。

ꀉꂿꅩꌺꑌ,
ꑌꑿꈬꊈꋍꈜꐥꂯꑌ,
ꁦꌺꈬꂷꈬꈚꐛꁧꃲ。
ꇌꎶꈬꏢꋍꈜꐥꂯꑌ,
ꁍꑗꈬꁍꈬꄷꎍꁧꃲ。
ꉜꏂꈬꏢꋍꈜꆗꂯꑌ,
ꆂꒉꈬꂡꈬꄷꒉꁧꃲ。
ꐛꑿꈬꈌꋍꈜꎑꂯꑌ,
ꃪꅪꈬꁕꈬꄷꐛꁧꃲ。
ꈌꃅꈬꋇꋍꈜꈹꂯꑌ,
ꌿꉘꈬꁍꈬꄷꐛꁧꃲ。
ꀉꐔꈬꑻꋍꈜꎔꂯꑌ,
ꁭꂥꈬꁯꈬꈚꋦꁧꃲ。

ꀉꂿꅩꌺꑌ,
ꅩꌺꀃꑍꋍꄮꆏ,
ꇓꅥꒉꉱꃹ,
ꀱꇁꋑꂸꋦꇈꃲ;
ꒊꊰꃪꈌꐂ,
ꈪꇁꋑꂸꋦꇈꃲ;
ꅪꏷꌐꅍꎭ,
ꂸꀱꇁꎜꄉꇊꃲ。

ꀉꂿꅩꌺꑌ,
ꅐꅑꀉꂿꉌꇨꆹ,
ꃅꃴꈥꏂꋍꂷꐥ,
ꌺꉘꃄꈌꄐꊂꐚꁧꃲ。
ꁖꅖꀉꂿꉌꇨꆹ,
ꊴꃀꐜꅪꋍꏢꐥ,
ꌺꉘꇉꅶꇴꋩꀕꅉꎭꁧꃲ。
ꃰꅑꀉꂿꉌꇨꆹ,
ꆺꑳꀉꂿꋍꂷꐥ,
ꅩꉘꌡꃅꎭꁧꃲ。

ꀉꂿꅩꌺꑌ,
ꃅꌌꈞꆈꋪ,
ꋪꏜꐥꉙꂸꐥꉙ,
ꃅꌋꃅꂸꇝꑟꃲ。
ꅪꐙꈞꆈꐛ,
ꐛꑭꌒꉙꂸꌒꉙ,
ꀿꃅꅪꂸꇝꇈꃲ,
ꅩꌺꎮꑍꅉ!

ꀉꂿꅩꌺꑌ,
ꀋꁧꂸꊨꇫꐥꌠ,
ꉌꇨꅪꄤꏹ,
ꉌꇨꅪꏷꑌ,
ꏂꆨꅪꄤꏹ,
ꃱꐻꃱꆹꎴ,
ꆫꌦꆫꂷꐻꒃꀣꎼꂵ;
ꑿꆨꅪꄤꏹ,
ꑿꆨꌋꈤꊪ,
ꆳꏂꃅꃴꋦ,
ꏦꍠꎔꌠꆳꅥꎓꎼꂵ;
ꃢꆪꅪꄤꏹ,
ꃢꆪꑬꊸꌬ,
ꇭꂷꅧꇗꀕ,
ꁮꑟꎔꌠꏝꌸꈘꎼꂵ。
ꀉꂿꅩꌺꑌ,
ꀎꋏꀿꃀꇫꐥꌠ,
ꀿꃀꉌꎔꑌ,
ꌺꇖꋦꀹꎆ;
ꌺꇖꉌꎔꑌ,
ꋚꑌꀿꃀꋙꑟꉬ;
ꁍꁈꉘꉩꆏ,
ꌺꇖꈛꎭꊐꑵꉬ;
ꅡꈭꉘꉩꆏ,
ꆗꌺꌦꆈꀸꑵꉬ。
ꋍꍂꌒꏡꎹ,
ꌺꇖꊂꋊꁵꇮꄸ;
ꋍꍂꎭꏡꎹ,
ꌺꇖꊂꋊꁵꂸꇮ。
ꀎꋏꋍꃅꑌ,
ꊂꋊꋍꄤꃅꇮꄸ。

ꇖ
ꀉꂿꅩꌺꑌ,
ꇪꀮꈂꉐꆏ,
ꆀꋦꀃꀿꃅ,
ꉷꋦꀃꀿꃅ;
ꌩꋦꀃꀿꃅ,
ꇓꎍꀃꀿꃅ,
ꒉꀕꀃꀿꃅ;
ꁧꐙꀃꀿꃅ,
ꇉꐙꀃꀿꃅ。
ꆲꁏꉎꋌꁏꌠꀃꀿꌗ,
ꅇꃅꉎꋌꇁꌠꀃꀿꅇ。
ꌩꊫꑌꌩꊸ,
ꇓꊫꑌꇓꊸ。
ꇪꀮꈍꐯꆏ,
ꆀꋦꀃꁭꂥ,
ꉷꋦꀃꁭꂥ;
ꌨꑌꀃꁭꂥ,
ꇒꑌꀃꁭꂥ,
ꒈꑌꀃꁭꂥ,
ꁦꑌꀃꁭꂥ,
ꇈꑌꀃꁭꂥ。
ꌩꊫꑌꌩꈻ,
ꇓꊫꑌꇓꈻ。

ꀉꂿꅩꌺꑌ,
ꐛꑿꇵꄓꆹꃪꅪ,
ꉜꏂꇵꄓꆹꆂꒉ,
ꏰꌺꇵꄓꆹꅔꐎ,
ꐓꇌꇵꄓꆹꌿꉘ,
ꅩꌺꇵꄓꆹꀿꃅ。
ꃪꅪꇵꄓꃅ,
ꐛꑿꇖꃅꌒ;
ꆂꒉꇵꄓꃅ,
ꉜꏂꆗꃅꌒ;
ꅔꐎꇵꄓꃅ,
ꏰꌺꋶꃅꌒ;
ꌿꉘꇵꄓꃅ,
ꐓꇌꀜꃅꌒ;
ꀿꃀꇵꄓꃅ,
ꌺꇖꈩꃅꌒꇈꃲ。

ꀉꂿꅩꌺꑌ,
ꁍꑗꆈꉙꀕ,
ꆿꁮꐤꉈꊪꑵꄸ;
ꀿꃀꏁꊤꀕ,
ꌺꇖꐤꉈꊪꑵꄸ。
ꋋꑌꁧꐙꁦꆹꎴ,
ꃄꐂꁦꆹꎴꁧꃲ,
ꀿꅇꅪꅇꏥꅉꎴꁧꃲ;
ꐦꐛꐦꆹꎴ,
ꌐꇁꐦꆹꎴꁧꃲ,
ꃀꅇꅪꅇꏥꅉꎴꁧꃲ;
ꁦꄅꇈꄅꄖ,
ꌒꇤꃄꅤꅼꁧꃲ,
ꃺꅇꑌꅇꏥꅉꎴꁧꃲ。
ꁧꇢꇉꇢꆹ,
ꁧꐙꀋꊉꎵꁧꃲ;
ꒉꇢꃪꇢꆹ,
ꆂꒉꈬꄂꐂꁧꃲ,
ꅩꌺꎭꇁꅧꅇꏥꅉꎴꁧꃲ。
ꅩꌺꀃꑍꇈꉈꆏ,
ꈍꐯꈀꉐꂿꇁꈧꄮꁨꆹꃲ,
ꈢꈐꈢꉈꃱꆹꄀꅉꎴꁧꃲ,
ꃅꃴꃄꅉꉒꏂꄓꅉꂥꁧꃲ。

ꀉꂿꅩꌺꑌ,
ꀊꆨꀿꇁꃀꐮꐥꇬꆹ,
ꀿꐰꌺꈩꌒ,
ꃀꐮꅪꑌꌒ;
ꀿꃀꒊꌋꀕ,
ꌺꇖꈩꀱꀕ,
ꅩꌺꉌꃅꑓꌒꐥ。
ꌕꈎꋍꈬꈚꑌꊸ,
ꌕꑍꋍꐚꋟꑌꂊ。
ꀋꃋꊈꇁꌐꐰꐥꇬꆏ,
ꀀꁈꈜꀕꇨ,
ꀉꁧꈜꀕꇨ,
ꅩꌺꉌꎭꑓꁧꐥ。
ꋍꑍꌕꋚꋟꑌꂮ,
ꋍꈓꌕꃢꈚꑌꈻꇈꃲ。
ꅩꌺꎮꑍꅉ!

ꀉꂿꅩꌺꑌ,
ꑋꊂꌕꆪꆹ,
ꈾꃚꁬꇱꀉꂿꃅꌠꐔ;
ꋅꊂꌕꆪꆹ,
ꀋꀨꀉꁘꀉꂿꅋꌠꊸ。
ꀃꑍꋍꄮꆏ,
ꑋꊂꌕꆪꆹ,
ꃀꇇꋚꂸꋠ,
ꂮꐚꈠꆺꄅꇈꃲ;
ꋅꊂꌕꆪꆹ,
ꀿꇇꎭꂸꈚ,
ꃴꇁꁍꈻꏽꇊꃲ,
ꅩꌺꎮꑍꅉ!

ꀉꂿꅩꌺꑌ,
ꅩꌺꌡꃅꐥꇬꆹ,
ꃅꈎꊰꑋꈓ,
ꃅꆪꊰꑋꆪ,
ꈎꐥꆪꂸꏦꇈꃲ;
ꃅꒉꊯꉬꉖ,
ꃅꅂꊯꉬꉖ,
ꑍꐥꉖꂸꏦꇈꃲ。
ꑍꆏꃅꑍꈜꀕꎴ,
ꐥꇊꃅꂸꈊ;
ꌊꆏꃅꉖꈜꀕꎴ,
ꀀꇊꃅꂸꄜꇈꃲ,
ꅩꌺꎮꑍꅉ!

ꀉꂿꅩꌺꑌ,
ꑙꆪꃬꆪꆏ,
ꇉꄩꇪꀮꂾꄧꀕꇁꃲ,
ꌺꍸꀿꉂꆨꉬꃲ。
ꇉꄩꇪꀮꆎꂷꑌ,
ꄓꆹꀋꁮꇉꉱꄓ,
ꈳꆹꀊꁭꊴꇉꈴ。
ꌩꋦꌩꄩꑌꄉꂿꇁꃲ,
ꌩꂸꋥꆏꇓꄩꑌꄉꂿꇁꃲ。
ꈬꌩꈬꇓꋌꂿꉘꁇꁉꇁꃲ,
ꈬꉙꈬꃪꋌꂿꇖꈭꀕꇁꃲ,
ꅩꌺꄚꈿꇖꈭꀕꇈꃲ。
ꇉꄩꇪꀮꑠꂷꑌ,
ꋍꇬꋌꂿꇉꈫꇁꄿꎭ,
ꁬꇁꆰꌺꋌꂿꆣꅊꀕ,
ꑌꇁꑾꐚꋌꂿꁍꎼꆣꈭꀕꇁꃲ;
ꋍꇬꋌꂿꊫꉻꈬꊂꎭ,
ꁬꃨꆰꃨꋌꂿꃨꈍꀕ,
ꁬꈬꐛꑿꋌꂿꇖꈭꀕꇁꃲ;
ꋍꇬꋌꂿꇉꅶꈬꊂꎭ,
ꌩꅿꇓꅿꋌꂿꃴꌡꀕꇁꃲ;
ꋍꇬꋌꂿꁦꀑꁧꄩꎭ,
ꆫꇁꃨꌠꋌꂿꏁꁏꀑꊥꑌꒉꃲ;
ꋍꇬꋌꂿꐦꐛꈬꊂꎭ,
ꊨꇁꂿꌠꋌꂿꇇꆹꐝꀱꀕꇈꃲ;
ꋍꇬꋌꂿꈭꇁꈜꈢꎭ,
ꎼꇁꈴꌠꋌꂿꑭꆹꐝꀱꀕꇈꃲ;
ꋍꇬꋌꂿꇽꐯꇽꑎꎭ,
ꅩꎭꀉꂿꋋꈨꑓꁴꑰꀕꇤ,
ꅩꌺꋋꈨꇖꈭꀕꇈꃲ。
ꇪꀮꂾꀕꌕꆪꂿ,
ꅩꌺꅉꀕꇖꇈꃲ,
ꅩꌺꎮꑍꅉ!

ꀉꂿꅩꌺꑌ,
ꑛꆪꆿꆪꆏ,
ꃅꃴꈥꏂꇖꇁꃲ,
ꅩꎭꃀꉂꆨꉬꃲ。
ꃅꃴꈥꏂꆎꂷꑌ,
ꄓꆹꈥꍫꀕꉘꄓ,
ꈳꆹꌦꃅꁮꒀꈴ。
ꄩꆹꈥꇴꇖꎓꀕ,
ꀏꆹꅫꇁꌱꏦꐩ。
ꃅꃴꈥꏂꆎꂷꑌ,
ꄾꆏꇭꀧꂿꎼꑟ,
ꀋꄿꂾꃚꈨꎼꑟ。
ꉹꁌꋋꂿꑓꁴꑰꀕꇤ,
ꅩꌺꋋꂿꑍꇁꌊꇖꏿꇈꃲ。
ꈥꏂꑍꆪꀉꄂꇴ,
ꅩꌺꅉꀕꇖꇈꃲ,
ꅩꌺꎮꑍꅉ!

ꀉꂿꅩꌺꑌ,
ꐆꑻꈬꁨꆏ,
ꒀꈩꀀꇖꏿ,
ꋌꇖꄲꃅꇖꎻꈁ,
ꋌꇖꌊꆏꉀꏜꂸꊌꇖꅊꇈ;
ꐷꈭꐷꇜꆏ,
ꃢꃀꀉꑣꏣꅑꏣꂿꇖꈭꀕ,
ꋌꇖꄲꃅꇖꎻꈁ,
ꋌꇖꑍꆏꌃꃅꂸꊌꇖꅊꇈ。
ꆺꑳꏂꃴꆏ,
ꆺꑳꀉꂿꇖ,
ꋌꇖꄲꃅꇖꎻꈁ,
ꋌꇖꉌꐒꇁꎭꇖꅊꇈ;
ꈵꃴꈵꎓꆏ,
ꈵꃴꅩꌺꇖ,
ꋌꇖꄲꃅꇖꎻꈁ,
ꋌꇖꐛꑭꂸꌒꇖꅊꇈ,
ꅩꎭꀉꂿꉁꆏꇖꅊꇈ,
ꅩꌺꎮꑍꅉ!

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：《ꀉꂿꅩꌺ》(ꉬ) ꊁꁬꌠ：《ꀉꂿꅩꌺ》(ꌕ)

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ