倮伍伟哲彝语散文：ꑌꊂꌕꆪ（阳春三月）
2001年，正是互联网兴起的年代，彝-人-网团队便确立了构建彝族文化数据库的宏远目标，初心不改，坚持走下去。
ꑿꆨꌋꈤꏸ，ꌩꋚꇓꂷꃨꀕꈨꌠꑋꆳꌌꃅꇕꄹꊂꃅꄁꃰꏿ，ꋍꏾꀕ，ꋍꀮꀕ，ꃮꆪꁯꆮꌡ，ꏂꆨꃰꌦꑌꀋꇊꌡ。ꈬ꒿ꈬꃪꈨꌠꎹꄓꃪꀮꐊꄉꈨꋩꈨꏦꐺ。ꉻꈫꉺꇤ，ꐷꈭꐷꇜ，ꄹꇬꄷꑐꀋꐥꅉꀋꐥ。
ꀈꉙꐦꀞꏮ，ꊮꃨꏂꇠꀕ。ꃨꄩꁯꆮꐛꑿꆏꒉꉢꇁꏽ，ꑌꈌꑴꁱꌡ。ꑋꆳꆲꌙꀕꃅꁏꇁꇬꆏ，ꊮꃨꈨꌠꒈꂃꒊꆱꌟꃅꋍꇚꋍꇚꃅꌗꂴꆾꉜꄉꇁ，ꊿꋌꎼꑓꉱꏂꏪꀕ，ꀄꂼꂻꌠꌡ。ꉌꃀꂷꌠꃨꄩꁯꆮꐊꄉꄂꃰꏿ，ꏃꇁꃅꃴꐥꌠꀉꁌꀋꁨꈨꌠꑌꊿꎺꇁ，ꂱꑳꑴꅉꐥꐨꐥꄸꈨꌠꑌꊿꉪꇁ。ꀋꋓꀋꉪꃅꉌꐡꑓꐡꇁ，ꑓꁴꇬꇉꑌ。
ꀈꉙꒊ꒜ꒈꒉꒈꆹꎴ，ꒊ꒜ꆹꈈꉜꏂꅿꁯꇙ，ꉜꏂꆾꃴꌠꆗꑮꆜꑱꉙꆏꍡꉢꇰꃅ，ꉂꅇꆏꌧꉢꅲꃅ 。ꒉꃴꉜꏂꋌꅲꎧꑱꌠꌡ，ꀜꐥꀜꆗꏿ，ꒉꃴꀍꀠꈨꌠꑌꋍꑴꅉꋋꌅꀋꄐꃅꏅꇁ，ꎓꁨꎓꑳꀕ，ꑌꋩꑌꏦꃅ，ꑠꃅꐛꅹꋍꈓꊰꑌꆪ，ꑿꆩꀨꇬꄉꄸ。
ꆀꃅꁡꇤꏭ，ꆫꄓꂿꄓꊸ，ꀃꑍꋌꄮꆏ，ꋍꑍꀋꃅꊰꑌꀋꋠꈜ。ꆺꑳꀿꃀꑌꑿꊂꈹꐺ，ꁬꇁꆰꌺꋌꁏꃴꍚꀕ。ꆀꃅꆗꌺꌩꈪꇁꄉꌌ，ꃅꂿꃅꊨꃛ。ꅫꇁꌱꃀꇗꀵꈜꈹꐺ，ꋚꊪꒉꏾꃛ，ꌣꈚꐞꄿꏂꃅꄸ。
ꃅꈎꋍꈓꊰꑌꆪ，ꑿꆩꀨꇬꄉ，ꑌꆳꆲꌙꀕ，ꁬꇁꆰꌺꋌꁏꃴꍚꀕ，ꌩꋚꇓꂷꋌꁏꃨꈍꀕ。ꑌꊂꌕꆪꉐꐙꁌꇗꀕ，ꇗꇁꉐꂷꐴꅑꅿ，ꊧꅑꃨ。
ꑌꅐꑋꈌꁏ，ꑌꈌꉙꐞꀕ，ꑌꆳꀿꌗ꒜ꌗꌡ，ꋌꁏꃅꇖꄹꊂꎭ，ꈁꑟꊸꆣꀕ；ꑌꊂꉐꐚꐎꇁꏂꅪꌡ，ꋌꐛꇿꑟꋚꁧꅿꁮꇙ，ꁬꋲꆰꑟꑌꈌꄖ。 ꑿꆨꌋꈤꏸ，ꋧꃅꇤꄧꋌꌌꇉꄩꇪꀮꌠꃅꐞꄧꀕ。
作者：倮伍伟哲（ꇉꃶꃤꎆ）， 汉名：伍宁江，四川省凉山州西昌市
2001年，正是互联网兴起的年代，彝-人-网团队便确立了构建彝族文化数据库的宏远目标，初心不改，坚持走下去。所属专题：
倮伍伟哲乡土文学
/ Recommendation
/ Reading list
- 1 快乐的彝族年
- 2 良心莫瘦――感悟人生系列之十
- 3 天堂里有没有互联网？――追悼文友杨...
- 4 火把节记事
- 5 读写人生（自传体散文）
- 6 彝人，望你一路走好
- 7 曾经年少爱追梦
- 8 最后的晚餐
- 9 彝族过年
- 10 母亲在夜里出走